خالد بدل الخدمة ..هو مبدلهاش ولكن غير بدل لبوسط ديالو وطلع للادارة مبقاش هيشوف غير الناس الخايبين ويتصادع معاهم ولا يسمع الهدرة فالتلفون العكس دابا هو للي هيرجع يغوت فالتلفون ويدير راسو مهم..هيبدا يشم ريحة معطر الجو ويسمع غير العرنسية للي هنا لمروك مجهدين فيها ويرجع يصبح على الأنسات الزوينات شكون بحالو..

أول نهار دخل حساب ليه هيعطيوه بيرو ودوش بحال مسلسلات مكسيكية لقا راسو فمسلسل مريكاني صالة شابعة بيروات فارقهم غير جاج وبلاستيك بحال لكوما..صراحة الحريم مزيانات ولكن متكونش معاهم بوحدك دخل سلم كيعرف شي وحدات وبالذات وحدة كانت كتشبع فيه غوات فالتلفون دابا تقادو لكتاف..مرة مرة كانت شي وحدة كتكتب ورقة وتحطها قدام صاحبتها ويبداو يضحكوا وهو داير راس ممسوقش ولا وحدة كتقول ليهم "سمعوا ألبنات" وهو حسب علمي راجل..بنادم بحال كانيش كيولف بزربة دخل معاهم فالخط..قبل كان كيعترض على هدرة دابا تعود على جماعة الدريات لكن تاهوا ولفهم على العادات ديالو دابا للي بغات تخرج معاه يشوفوا شي حاجة خصها تلبس حوايجها بحال الناس مفيه ميسمع التعاليق من زملاء الأمس ..هو براسو عاقل مني كان كيقولو مني كتجيهم شي وحدة تراقب" ناري وكن كانت معايا فالبيرو كن.." دابا صحابو كيشدوا فيه كيقولوا وليتي كتجي بكري وتمشي معطل وبلا فايدة كن كنا بلاصتك..والله وتكونوا بلاصتي تترجعوا بحالي ثلاجة ال جي يرجع يبان ليكم غير الدار والنعاس..كيحساب ليهم عايش سعيد نهار العيد كان بحالهم ولكن السيد عيا..للي كتبغي حاجة كيبان ليها خالد الظريف ..اجي معايا نشري هادي.بغيت للي يوصلني هنا..شفرو ليا بورطابلي كتعرف شي كوميسير ولاشي شفار..اجي معانا دايرين خرجة للقبر..صحابو حسدوه على كثرة المكالمات وهو كيشوف حالو بحال المشة للي مربيها.. يوكلها ويربيها ومن شهرين لشهرين كيجي واحد ميغالو كيولدها ويمشي وخونا فالله يبدا يربي ليه فولادو ..جيب الحوت جيب الحليب غسل لمشاش..هدا حال خالد ولكن صراحة الله للي كينسيه فهادشي كامل أنه لقا فالدريات الرجلة للي ملقاها فدراري نهار كيزبلها ولا كيضرب الوقت كيلقا للي مكالي عليه ووقت المعقول كيوقفوا وقفة رجل واحد و7 بنات..ونيت كيفقص لعديان مني كدوز شي وحدة وتسلم عليه وتجاهل للي حداه

رمضان كريم